ଶ୍ରୀ ରାମ ରକ୍ଷା ସ୍ତୋତ୍ରମ୍ ଓଡ଼ିଆରେ (Ram Raksha Stotra in Odia)

॥ ବିନିଯୋଗଃ ॥
ଅସ୍ୟ ଶ୍ରୀରାମରକ୍ଷାସ୍ତୋତ୍ରମନ୍ତ୍ରସ୍ୟ ବୁଧକୌଶିକ ଋଷିଃ।
ଶ୍ରୀସୀତାରାମଚନ୍ଦ୍ରୋ ଦେବତା। ଅନୁଷ୍ଟୁପ୍ ଛନ୍ଦଃ। ସୀତା ଶକ୍ତିଃ।
ଶ୍ରୀମଦ୍ହନୁମାନ୍ କୀଲକମ୍। ଶ୍ରୀରାମଚନ୍ଦ୍ରପ୍ରୀତ୍ୟର୍ଥେ ଜପେ ବିନିଯୋଗଃ॥

॥ ଅଥ ଧ୍ୟାନମ୍ ॥
ଧ୍ୟାୟେଦାଜାନୁବାହୁଂ ଧୃତଶରଧନୁଷଂ ବଦ୍ଧପଦ୍ମାସନସ୍ଥଂ
ପୀତଂ ବାସୋ ବସାନଂ ନବକମଲଦଲସ୍ପର୍ଧିନେତ୍ରଂ ପ୍ରସନ୍ନମ୍।
ବାମାଙ୍କାରୂଢ଼ସୀତା ମୁଖକମଲମିଲଲ୍ଲୋଚନଂ ନୀରଦାଭଂ
ନାନାଲଙ୍କାରଦୀପ୍ତଂ ଦଧତମୁରୁଜଟାମଣ୍ଡଲଂ ରାମଚନ୍ଦ୍ରମ୍॥

ଚରିତଂ ରଘୁନାଥସ୍ୟ ଶତକୋଟିପ୍ରବିସ୍ତରମ୍।
ଏକୈକମକ୍ଷରଂ ପୁଂସାଂ ମହାପାତକନାଶନମ୍॥ ୧॥

ଧ୍ୟାତ୍ୱା ନୀଲୋତ୍ପଲଶ୍ୟାମଂ ରାମଂ ରାଜୀବଲୋଚନମ୍।
ଜାନକୀଲକ୍ଷ୍ମଣୋପେତଂ ଜଟାମୁକୁଟମଣ୍ଡିତମ୍॥ ୨॥

ସାସିତୂଣୀରଧନୁଃଶରପାଣିଂ ନକ୍ତଞ୍ଚରାନ୍ତକମ୍।
ସ୍ୱଲୀଲୟା ଜଗତ୍ତ୍ରାତୁମାବିର୍ଭୂତମଜଂ ବିଭୁମ୍॥ ୩॥

ରାମରକ୍ଷାଂ ପଠେତ୍ପ୍ରାଜ୍ଞଃ ପାପଘ୍ନୀଂ ସର୍ବକାମଦାମ୍।
ଶିରୋ ମେ ରାଘବଃ ପାତୁ ଭାଲଂ ଦଶରଥାତ୍ମଜଃ॥ ୪॥

କୌସଲ୍ୟେୟୋ ଦୃଶୌ ପାତୁ ବିଶ୍ୱାମିତ୍ରପ୍ରିୟଃ ଶ୍ରୁତୀ।
ଘ୍ରାଣଂ ପାତୁ ମଖତ୍ରାତା ମୁଖଂ ସୌମିତ୍ରିବତ୍ସଲଃ॥ ୫॥

ଜିହ୍ୱାଂ ବିଦ୍ୟାନିଧିଃ ପାତୁ କଣ୍ଠଂ ଭରତବନ୍ଦିତଃ।
ସ୍କନ୍ଧୌ ଦିବ୍ୟାୟୁଧଃ ପାତୁ ଭୁଜୌ ଭଗ୍ନେଶକୋଦଣ୍ଡଃ॥ ୬॥

କରୌ ସୀତାପତିଃ ପାତୁ ହୃଦୟଂ ଜାମଦଗ୍ନ୍ୟଜିତ୍।
ମଧ୍ୟଂ ପାତୁ ଖରଧ୍ୱଂସୀ ନାଭିଂ ଜାମ୍ବବଦାଶ୍ରୟଃ॥ ୭॥

ସୁଗ୍ରୀବେଶଃ କଟୀ ପାତୁ ସକ୍ଥିନୀ ହନୁମତ୍ପ୍ରଭୁଃ।
ଊରୂ ରଘୂତ୍ତମଃ ପାତୁ ରକ୍ଷଃକୁଲବିନାଶକୃତ୍॥ ୮॥

ଜାନୁନୀ ସେତୁକୃତ୍ ପାତୁ ଜଙ୍ଘେ ଦଶମୁଖାନ୍ତକଃ।
ପାଦୌ ବିଭୀଷଣଶ୍ରୀଦଃ ପାତୁ ରାମୋଽଖିଲଂ ବପୁଃ॥ ୯॥

ଏତାଂ ରାମବଲୋପେତାଂ ରକ୍ଷାଂ ଯଃ ସୁକୃତୀ ପଠେତ୍।
ସ ଚିରାୟୁଃ ସୁଖୀ ପୁତ୍ରୀ ବିଜୟୀ ବିନୟୀ ଭବେତ୍॥ ୧୦॥

ପାତାଲଭୂତଲବ୍ୟୋମ ଚାରିଣଶ୍ଛଦ୍ମଚାରିଣଃ।
ନ ଦ୍ରଷ୍ଟୁମପି ଶକ୍ତାସ୍ତେ ରକ୍ଷିତଂ ରାମନାମଭିଃ॥ ୧୧॥

ରାମେତି ରାମଭଦ୍ରେତି ରାମଚନ୍ଦ୍ରେତି ବା ସ୍ମରନ୍।
ନରୋ ନ ଲିପ୍ୟତେ ପାପୈର୍ଭୁକ୍ତିଂ ମୁକ୍ତିଂ ଚ ବିନ୍ଦତି॥ ୧୨॥

ଜଗଜ୍ଜୈତ୍ରୈକମନ୍ତ୍ରେଣ ରାମନାମ୍ନାଭିରକ୍ଷିତମ୍।
ଯଃ କଣ୍ଠେ ଧାରୟେତ୍ତସ୍ୟ କରସ୍ଥାଃ ସର୍ବସିଦ୍ଧୟଃ॥ ୧୩॥

ବଜ୍ରପଞ୍ଜରନାମେଦଂ ଯୋ ରାମକବଚଂ ସ୍ମରେତ୍।
ଅବ୍ୟାହତାଜ୍ଞଃ ସର୍ବତ୍ର ଲଭତେ ଜୟମଙ୍ଗଲମ୍॥ ୧୪॥

ଆଦିଷ୍ଟବାନ୍ ଯଥା ସ୍ୱପ୍ନେ ରାମରକ୍ଷାମିମାଂ ହରଃ।
ତଥା ଲିଖିତବାନ୍ ପ୍ରାତଃ ପ୍ରବୁଦ୍ଧୋ ବୁଧକୌଶିକଃ॥ ୧୫॥

ଆରାମଃ କଲ୍ପବୃକ୍ଷାଣାଂ ବିରାମଃ ସକଲାପଦାମ୍।
ଅଭିରାମସ୍ତ୍ରିଲୋକାନାଂ ରାମଃ ଶ୍ରୀମାନ୍ ସ ନଃ ପ୍ରଭୁଃ॥ ୧୬॥

ତରୁଣୌ ରୂପସମ୍ପନ୍ନୌ ସୁକୁମାରୌ ମହାବଲୌ।
ପୁଣ୍ଡରୀକବିଶାଲାକ୍ଷୌ ଚୀରକୃଷ୍ଣାଜିନାମ୍ବରୌ॥ ୧୭॥

ଫଲମୂଲାଶିନୌ ଦାନ୍ତୌ ତାପସୌ ବ୍ରହ୍ମଚାରିଣୌ।
ପୁତ୍ରୌ ଦଶରଥସ୍ୟୈତୌ ଭ୍ରାତରୌ ରାମଲକ୍ଷ୍ମଣୌ॥ ୧୮॥

ଶରଣ୍ୟୌ ସର୍ବସତ୍ତ୍ୱାନାଂ ଶ୍ରେଷ୍ଠୌ ସର୍ବଧନୁଷ୍ମତାମ୍।
ରକ୍ଷଃକୁଲନିହନ୍ତାରୌ ତ୍ରାୟେତାଂ ନୋ ରଘୂତ୍ତମୌ॥ ୧୯॥

ଆତ୍ତସଜ୍ଜଧନୁଷାବିଷୁସ୍ପୃଶାବକ୍ଷୟାଶୁଗନିଷଙ୍ଗସଙ୍ଗିନୌ।
ରକ୍ଷଣାୟ ମମ ରାମଲକ୍ଷ୍ମଣାବଗ୍ରତଃ ପଥି ସଦୈବ ଗଚ୍ଛତାମ୍॥ ୨୦॥

ସଂନଦ୍ଧଃ କବଚୀ ଖଡ୍ଗୀ ଚାପବାଣଧରୋ ଯୁବା।
ଗଚ୍ଛନ୍ ମନୋରଥାନ୍ନଶ୍ଚ ରାମଃ ପାତୁ ସଲକ୍ଷ୍ମଣଃ॥ ୨୧॥

ରାମୋ ଦାଶରଥିଃ ଶୂରୋ ଲକ୍ଷ୍ମଣାନୁଚରୋ ବଲୀ।
କାକୁତ୍ସ୍ଥଃ ପୁରୁଷଃ ପୂର୍ଣ୍ଣଃ କୌସଲ୍ୟେୟୋ ରଘୂତ୍ତମଃ॥ ୨୨॥

ବେଦାନ୍ତବେଦ୍ୟୋ ଯଜ୍ଞେଶଃ ପୁରାଣପୁରୁଷୋତ୍ତମଃ।
ଜାନକୀବଲ୍ଲଭଃ ଶ୍ରୀମାନପ୍ରମେୟପରାକ୍ରମଃ॥ ୨୩॥

ଇତ୍ୟେତାନି ଜପେନ୍ନିତ୍ୟଂ ମଦ୍ଭକ୍ତଃ ଶ୍ରଦ୍ଧୟାନ୍ୱିତଃ।
ଅଶ୍ୱମେଧାଧିକଂ ପୁଣ୍ୟଂ ସଂପ୍ରାପ୍ନୋତି ନ ସଂଶୟଃ॥ ୨୪॥

ରାମଂ ଦୂର୍ବାଦଲଶ୍ୟାମଂ ପଦ୍ମାକ୍ଷଂ ପୀତବାସସମ୍।
ସ୍ତୁବନ୍ତି ନାମଭିର୍ଦିବ୍ୟୈର୍ନ ତେ ସଂସାରିଣୋ ନରାଃ॥ ୨୫॥

ରାମଂ ଲକ୍ଷ୍ମଣପୂର୍ବଜଂ ରଘୁବରଂ ସୀତାପତିଂ ସୁନ୍ଦରଂ
କାକୁତ୍ସ୍ଥଂ କରୁଣାର୍ଣ୍ଣବଂ ଗୁଣନିଧିଂ ବିପ୍ରପ୍ରିୟଂ ଧାର୍ମିକମ୍।
ରାଜେନ୍ଦ୍ରଂ ସତ୍ୟସନ୍ଧଂ ଦଶରଥତନୟଂ ଶ୍ୟାମଲଂ ଶାନ୍ତମୂର୍ତ୍ତିଂ
ବନ୍ଦେ ଲୋକାଭିରାମଂ ରଘୁକୁଲତିଲକଂ ରାଘବଂ ରାବଣାରିମ୍॥ ୨୬॥

ରାମାୟ ରାମଭଦ୍ରାୟ ରାମଚନ୍ଦ୍ରାୟ ବେଧସେ।
ରଘୁନାଥାୟ ନାଥାୟ ସୀତାୟାଃ ପତୟେ ନମଃ॥ ୨୭॥

ଶ୍ରୀରାମ ରାମ ରଘୁନନ୍ଦନ ରାମ ରାମ।
ଶ୍ରୀରାମ ରାମ ଭରତାଗ୍ରଜ ରାମ ରାମ।
ଶ୍ରୀରାମ ରାମ ରଣକର୍କଶ ରାମ ରାମ।
ଶ୍ରୀରାମ ରାମ ଶରଣଂ ଭବ ରାମ ରାମ॥ ୨୮॥

ଶ୍ରୀରାମଚନ୍ଦ୍ରଚରଣୌ ମନସା ସ୍ମରାମି।
ଶ୍ରୀରାମଚନ୍ଦ୍ରଚରଣୌ ବଚସା ଗୃହ୍ଣାମି।
ଶ୍ରୀରାମଚନ୍ଦ୍ରଚରଣୌ ଶିରସା ନମାମି।
ଶ୍ରୀରାମଚନ୍ଦ୍ରଚରଣୌ ଶରଣଂ ପ୍ରପଦ୍ୟେ॥ ୨୯॥

ମାତା ରାମୋ ମତ୍ପିତା ରାମଚନ୍ଦ୍ରଃ।
ସ୍ୱାମୀ ରାମୋ ମତ୍ସଖା ରାମଚନ୍ଦ୍ରଃ।
ସର୍ବସ୍ୱଂ ମେ ରାମଚନ୍ଦ୍ରୋ ଦୟାଲୁର୍-
ନାନ୍ୟଂ ଜାନେ ନୈବ ଜାନେ ନ ଜାନେ॥ ୩୦॥

ଦକ୍ଷିଣେ ଲକ୍ଷ୍ମଣୋ ଯସ୍ୟ ବାମେ ଚ ଜନକାତ୍ମଜା।
ପୁରତୋ ମାରୁତିର୍ୟସ୍ୟ ତଂ ବନ୍ଦେ ରଘୁନନ୍ଦନମ୍॥ ୩୧॥

ଲୋକାଭିରାମଂ ରଣରଙ୍ଗଧୀରଂ
ରାଜୀବନେତ୍ରଂ ରଘୁବଂଶନାଥମ୍।
କାରୁଣ୍ୟରୂପଂ କରୁଣାକରଂ ତଂ
ଶ୍ରୀରାମଚନ୍ଦ୍ରଂ ଶରଣଂ ପ୍ରପଦ୍ୟେ॥ ୩୨॥

ମନୋଜବଂ ମାରୁତତୁଲ୍ୟବେଗମ୍
ଜିତେନ୍ଦ୍ରିୟଂ ବୁଦ୍ଧିମତାଂ ବରିଷ୍ଠମ୍।
ବାତାତ୍ମଜଂ ବାନରଯୂଥମୁଖ୍ୟଂ
ଶ୍ରୀରାମଦୂତଂ ଶରଣଂ ପ୍ରପଦ୍ୟେ॥ ୩୩॥

କୂଜନ୍ତଂ ରାମ ରାମେତି ମଧୁରଂ ମଧୁରାକ୍ଷରମ୍।
ଆରୁହ୍ୟ କବିତାଂ ଶାଖାଂ ବନ୍ଦେ ବାଲ୍ମୀକିକୋକିଲମ୍॥ ୩୪॥

ଆପଦାମପହର୍ତାରଂ ଦାତାରଂ ସର୍ବସମ୍ପଦାମ୍।
ଲୋକାଭିରାମଂ ଶ୍ରୀରାମଂ ଭୂୟୋ ଭୂୟୋ ନମାମ୍ୟହମ୍॥ ୩୫॥

ଭର୍ଜନଂ ଭବବୀଜାନାମର୍ଜନଂ ସୁଖସମ୍ପଦାମ୍।
ତର୍ଜନଂ ଯମଦୂତାନାଂ ରାମନାମେତି ଗର୍ଜନମ୍॥ ୩୬॥

ରାମୋ ରାଜମଣିଃ ସଦା ବିଜୟତେ ରାମଂ ରମେଶଂ ଭଜେ
ରାମେଣାଭିହତା ନିଶାଚରଚମୂ ରାମାୟ ତସ୍ମୈ ନମଃ।
ରାମାନ୍ନାସ୍ତି ପରାୟଣଂ ପରତରଂ ରାମସ୍ୟ ଦାସୋଽସ୍ମ୍ୟହଂ
ରାମେ ଚିତ୍ତଲୟଃ ସଦା ଭବତୁ ମେ ଭୋ ରାମ ମାମୁଦ୍ଧର॥ ୩୭॥

ରାମ ରାମେତି ରାମେତି ରମେ ରାମେ ମନୋରମେ।
ସହସ୍ରନାମ ତତ୍ତୁଲ୍ୟଂ ରାମନାମ ବରାନନେ॥ ୩୮॥